HOMENAXE A MIRO CASABELLA EN RIBADEO
O vindeiro 5 de
xullo arredor dunha vintena de asociacións culturais organizan un acto de
recoñecemento ao cantante Miro Casabella en Ferreira do Valadouro.
Como preámbulo, en Ribadeo, este venres tamén
terán lugar actividades encamiñadas a homenaxar a súa figura.
Quérese sobre
todo poñer en valor o labor de recuperación democrática e de pensamento galeguista e
nacionalista ao que contribuíron figuras da canción galega na época do tardo franquismo e a chamada transición.
Nomes como
Voces Ceibes, Fuxan os Ventos, Movemento da Canción Popular Galega…forman parte
dun imaxinario colectivo non sempre valorado e coñecido no noso país . As súas foron músicas que
acompañaron tempos reivindicativos, nos que se puxeron os alicerces para
alcanzar dereitos que hoxe nos rouban. O abandono do rural, a emigración, a
desprotección do medio natural , o querer reducir a nosa cultura ao falsamente
folclórico…iso é o hoxe que estamos a vivir.
Onte,
organizacións centradas no país mobilizáronse contra por ex., a cota
empresarial aos labregos, a construción dunha piscifactoria en Baldaio, as
expropiacións nas Encrobas ou, xa concretamente na Mariña, a construción dunha
central nuclear en Xove.
Son tempos pois
tamén de VOLVER CEIBAR A VOZ. E a homenaxe a Miro Casabella enténdese tamén
dese xeito.
A data elixida,
o venres 25 de abril, é tamén simbólica pola repercusión que a Revolución do
Cravos en 1974 en Portugal tivo para os movementos sociais e políticos galegos
da época.
Os actos do
venres en Ribadeo consistirán nunha
exposición fotográfica na rúa peoníl que recolle imaxes de mobilizacións
sociais e de traballos discográficos da época. Esta pequena mostra estará
colocada desde a mañá á noite.
Ás 21.00 h e
logo dun pasarrúas desde o Cantón con componentes do grupo de música
tradicional da A.C. Tumba e Dálle actuarán á entrada do Teatro as pandereteiras
da A.C. Alesancia.
Haberá reparto
de caraveis vermellos e postais e darase
comezo a un concerto que incluirá as
actuacións de Tundal, grupo do componente de Fuxan os Ventos Antón Castro, a
xove promesa ribadense Carmen Rguez ,
que versionará un tema de Miro e o virtuoso gaiteiro do Conservatorio de
Viveiro David Bellas que, entre outras pezas, interpretará unha peza escrita en
homenaxe. Ademais, farán lecturas Eliseo
García Bouso (Agrupación Cultural Francisco Lanza, Ribadeo) e
Tamara Rubiños (colectivo cultural Ollomao, Barreiros)
Presenta o
xornalista Xosé Salgado Agrelo (Asoc. M de Meira )
Contando coa
colaboración do Concello de Ribadeo e a Área de Cultura da Deputación de Lugo,
na organización deste evento participan as seguintes entidades: A.C.
Arrincadeira de Riotorto, A.C. M de Meira, Colectivo Cultural Ollomao de
Barreiros, A.C. Os tres pés de Trabada, Irmandade San Caetano de Barreiros,
Observatorio da Mariña pola Igualdade , Tumba e Dálle de Barreiros, A.C.
Francisco Lanza, Azou, Alesancia e Musiqueando
de Ribadeo
Ribadeo, 23 de
abril de 2014.
